Припять (укр. Прип'ять) у Украинæйы Киевы облæсты æдзæрæг сахар, йе ’мном цæугæдоны былгæрон. Сахары бындур сæвæрдæуы 1970-æм азы 4 февралы, йæ цæрджытæ дзы ацыдысты (эвакуацигонд æрцыдысты) 1986-æм азы 27 апрелы Чернобылы аварийы фæстиуæгæн.
Сахар аразын байдыдтой, цæмæй дзы цæрой Чернобылы атомон электростанцæйы кусджытæ. Уымæй Припять сси Советон Цæдисы фарæстæм «атомы сахар» (уырыс. атомград). Электростанцæйы йеддæмæ æндæр промышленнон куыстуæттæ дæр дзы уыдысты, æппæты зынгæдæр — радиозавод «Юпитер».
Цæрджыты фæстаг сфыстмæ гæсгæ (1985-æм азы ноябрь) сахары цардысты 47 мин 500 адæймаджы, 25 адæмы хаттæй. Æрвылаз уыдоныл-иу æфтыд 1500 адæймагæй фылдæр (аст сæдæйы бæрц — ноггуырдтæ). Проектмæ гæсгæ сахары хъуамæ æрцæрой 75—78 мин адæймаджы, фæлæ уыцы пълан нæ фæрæстмæ.
Припять уыд æфсæнвæндагон æлхынцъ (станцæ Янов) æмæ цæугæдоны науты лæууæн.